ఆది. నవం 18th, 2018

పురాణాల్లోని బలమైన ఈ పాత్రలే నేటి మహిళలకు ఆదర్శం!!

పురాతన హిందూ గ్రంథాల్లో కొన్ని మహిళ పాత్రలను బలంగా తీర్చిదిద్దారు. వారిలో సీత, మేనక, మండోదరి, గంగ లాంటి పాత్రలు నేటి తరం మహిళలకు ఎంతో ఆదర్శం. అంతర్జాతీయ మహిళ దినోత్సవం సందర్భంగా హిందూ పురాణల్లో మహిళ పాత్రల గురించి ఒక్కసారి తెలుసుకుందాం.
శ్రీమహావిష్ణువు స్త్రీ రూపం మోహిని. దేవతలకు ఈ అవతారం ఓ పెద్ద వరం. మోహినిని అస్త్రంగా చేసుకున్న దేవతలు అమృత కలశాన్ని రాక్షసుల నుంచి తెలివిగా తీసుకున్నారు. మహాభారతంలో వేదవ్యాసుడు మోహిని వృత్తాంతం గురించి పేర్కొన్నాడు. మోహిని పాత్రను స్ఫూర్తిగా తీసుకుని ప్రస్తుత కాలంలో అందమైన మగువలు కూడా తమ కార్యాలను నెరవేర్చుకుంటున్నారు.హిడింబి ఎవరు సహకారం లేకుండా ఒంటరిగానే తన కుమారుడు ఘటోత్కచుడికి ఉన్నత విలువలను, సుగుణాలను నేర్పింది. హిడింబాసురుడనే రాక్షసుని సోదరి హిడింబి. పాండవులను అంతం చేయడానికి ధుర్యోదనుడు లక్క గృహానికి పంపినప్పుడు ఈ విషయం తెలుసుకున్న వారు అక్కడ నుంచి తప్పించుకుని ఓ అరణ్యంలో ప్రవేశిస్తారు. తమపై దాడిచేసిన హిడింబాసురుని భీముడు సంహరిస్తాడు.

అతని సోదరి హిడింబి మాత్రం భీముడిని ప్రేమిస్తుంది. ఆ తర్వాత హిడింబిని వివాహం చేసుకుని కొంత కాలం తర్వాత భీముడు హస్తినకు చేరుకుంటాడు. భీముడు అక్కడ నుంచి వెడలిపోయిన తర్వాత హిడింబికి ఘటోత్కచుడు జన్మిస్తాడు. అప్పటి నుంచి తన కుమారుడిని పెంచి పెద్ద చేసి ఆదర్శంగా నిలిపింది.

భర్త శాప విమోచనం కోసం అప్పుడే పుట్టిన తన పుత్రులను గంగ త్యాగం చేసింది. ప్రస్తుత ఆధునిక సమాజంలో మహిళలకు కూడా భర్త విజయంలో కూడా కీలక పాత్ర పోషిస్తున్నారు. హిందూ పురాణాల్లో నిష్కల్మషమైన గంగ పవిత్రతను గురించి పేర్కొన్నారు.

రావణుడి భార్యయైన మండోదరి తన ఆధ్యాత్మిక చింతనతో నిశ్శబ్దాన్ని పాటించింది. ఈమె అందమైన మహిళేకాదు, తెలివైనది కూడా. సీత విషయంలో రావణుడి చర్యలను తీవ్రంగా వ్యతిరేకించింది. అంతే కాదు దీని వల్ల అంతం తప్పదని కూడా హెచ్చరించింది.

వాలి భార్యయైన తార గొప్ప ధర్మ విలువలగల మహిళ. అంతరిక్షంతో సంబంధం కలిగిన తార గూఢచర్యంలోనూ, ఇతరులపై దయ చూపడంలోనూ తన ప్రవీణ్యతను చాటుకుంది.

జనకుడి కుమార్తె, శ్రీరాముని భార్యయైన సీత సహనశీలి. తన క్షమాగుణంతో భూదేవిని మించిన మహిళ. భర్త కోసం అన్నింటిని త్యాగం చేసిన జానకి, ఒంటిరి తల్లిగానూ లవకుశలకు జన్మనిచ్చి వారిని గొప్ప వీరులుగా తీర్చిదిద్దింది.

ద్రుపదుడు యఙ్ఞవాటికలో అగ్ని నుంచి జన్మించిన శక్తి స్వరూపిణి ద్రౌపది. అగ్ని జ్వాల మాదిరిగా అందమైన, బలమైన మహిళ. అలాగే మంచి వ్యూహకర్త కూడా. తనను నిండు సభలో అవమానించిన కౌరవులపై ప్రతీకారం తీర్చుకోవడంలో ఆమె సఫలమైంది. అంతే కాదు ఆ సంఘటనను పదేపదే గుర్తుచేసుకుంటూ మహాభారత యుద్ధానికి పరోక్షంగా కారణమైంది.

స్పందించండి

మీ ఈమెయిలు చిరునామా ప్రచురించబడదు. తప్పనిసరి ఖాళీలు *‌తో గుర్తించబడ్డాయి

error: Content is protected !!